Казан форум кысаларында бердәм киңлек мәгълүматлары ресурсын булдыру турында фикер алыштылар

2023 елның 18 мае, пәнҗешәмбе

Фәнил Әһлиуллин «Россия – Ислам дөньясы: KazanForum 2023» XIV халыкара икътисадый форумы кырында Росреестрның «Инвестицион сәясәтнең яңа инструментлары һәм Россия төбәкләренең территориаль үсеше» панель дискуссиясендә катнашты.

Сессиядә катнашучылар барлык ведомстволар һәм халык өчен бердәм киңлек мәгълүматлары ресурсын булдыру турында фикер алыштылар: өстенлекле бурычлар һәм юнәлешләр. Шулай ук күчемсез милек базарында катнашучыларны тулы һәм төгәл геопространственный мәгълүмат белән тәэмин итүнең мөһимлеге ассызыкланды.

Катнашучылар шулай ук Кыргыз Республикасы һәм Берләшкән Гарәп Әмирлекләре мисалында нәтиҗәле идарә итү, социаль һәм икътисади үсеш өчен киңлек мәгълүматларын куллану буенча чит ил тәҗрибәсе белән уртаклаштылар.