Татарстан Лисичанск белән муниципаль милек белән идарә итү тәҗрибәсен уртаклашты
Луганск Халык Республикасының Татарстан шефлыгындагы территорияләренә кураторлык итүче ТР вице-премьеры Фәнил Әһлиуллин чакыру буенча Лисичанскига муниципаль милек белән идарә итү өлкәсендәге экспертлар килде. Февраль азагында шәһәр администрациясе вәкилләре һәм муниципаль предприятиеләр җитәкчеләре өчен уку семинарлары узды.
Татарстан белгечләре арасында ТР Җир һәм мөлкәт мөнәсәбәтләре министрлыгының Хокук идарәсе башлыгы Зөлфәт Галәветдинов, ТР Җир һәм мөлкәт мөнәсәбәтләре министрлыгы Стратегик планлаштыру һәм хосусыйлаштыру бүлегенең элеккеге җитәкчесе Марсель Миңнуллин, шулай ук ТР Җир һәм мөлкәт мөнәсәбәтләре министрлыгы икътисад бүлегенең элеккеге башлыгы Лилия Гайзетдинова бар иде.
Семинарлар программасында түбәндәге төп мәсьәләләр каралды:
- муниципаль предприятиеләрнең хокукый статусы һәм эш үзенчәлекләре;
- аларны реформалау тәртибе һәм механизмнары;
- предприятиеләр эшчәнлегенең нәтиҗәлелеген бәяләүнең заманча ысуллары.
Укудан соң «сорау-җавап» форматында түгәрәк өстәл узды. Биредә катнашучылар шәһәр предприятиеләре белән идарә итүнең актуаль проблемалары турында фикер алышты һәм аларны хәл итү өчен конкрет тәкъдимнәр алды. Татарстан белән тәҗрибә алышу – Лисичанск шәһәр идарәсен нәтиҗәлерәк итү мөмкинлеге. Татарстан белгечләре Лисичанск җитәкчеләренә предприятиеләрне реформалаштыруда, аларның эшен яхшыртуда һәм заманча идарә алымнарын гамәлгә кертүдә ярдәм итте. Татарстан Республикасы Лисичанскига эксперт ярдәме күрсәтүен һәм шәһәр инфраструктурасын үстерүдә ярдәм итүен дәвам итәчәк, дип ышандырдылар ТР вице-премьеры Фәнил Әһлиуллин аппаратында.