2025 елның 4 октябреннән ЕГРНнан алынган өземтәгә кертелгән үзгәрешләр турында
ТР Җир һәм мөлкәт мөнәсәбәтләре министрлыгы һәм Дәүләт кадастр бәяләү үзәге Росреестрның П/0285/25 номерлы боерыгы үз көченә керүе турында хәбәр итә. Ул күчемсез милек объектына хокуклар турында бердәм дәүләт күчемсез милек реестрыннан (ЕГРН) алынган өземтә формасына үзгәрешләр кертә.
Үзгәрешләр:
Төп үзгәреш торак урыннан хуҗа (милекче) белән беррәттән файдалану хокукына ия затлар турындагы белешмәләрне өземтәдә мәҗбүри чагылдыруга кагыла.
Сүз ике төп категория турында бара:
- Хосусыйлаштыру вакытында гаилә әгъзалары. Өземтәгә хосусыйлаштыру вакытында торак белән файдалануга тигез хокуклары булган, әмма хосусыйлаштыруда хуҗа (милекче) файдасына катнашудан баш тарткан барлык затлар (элеккеге гаилә әгъзаларын да кертеп) турында мәгълүматлар кертеләчәк. Аларның әлеге торак урыннан гомерлек файдалану хокукы саклана.
- Гаилә әгъзалары торак кооперативларында. Торак комплексына яки торак-төзелеш кооперативына пай взносын тулысынча түләү вакытына гаилә әгъзалары буларак күрсәтелгән яки күчерелгән затлар турында документта мәгълүмат күренәчәк. Нәтиҗәдә, алар торактан файдалану хокукына ия булалар. Язмалар кертү өчен нигез булып беренчел хокук билгели торган документлар: ордер, кооперативның гомуми җыелышы карары яисә законлы көченә кергән суд карары хезмәт итәчәк.
Яңалыкның максатлары һәм гамәли файдасы:
Элек күрсәтелгән җитди юридик әһәмияткә ия хокуклар ЕГРНда тулы күләмдә чагылдырылмаган. Аларны ачыклау өчен объектның тарихын тирәнтен тикшерү, архив материалларын өйрәнү һәм юристларны җәлеп итү таләп ителә. Бу намуслы сатып алучыларны куркыныч алдында калдыра иде.
Яңа тәртипнең өстенлекләре:
- Объектны тикшергәндә ачыклыкны арттыру.
- Хокукый куркынычларның кимүе.
- Гражданнар хокукларын яклауны ныгыту.
Өземтәнең яңартылган формасы Росреестрдан сорала торган барлык документлар өчен 2025 елның 4 октябреннән гамәлдә.
Дәүләт кадастр бәяләве үзәге.