Студент отрядлары ярдәмендә ел саен 10 меңнән артык студент ел әйләнәсе эш таба
Татарстан Республикасы Яшьләр эшләре министрлыгы теләге булган һәркемне «Россия Студент Отрядлары» (РСО) Бөтенроссия яшьләр иҗтимагый оешмасы сафына чакыра. РСО – илнең иң зур яшьләр оешмасы, ул РФнең 74 субъектыннан 240 меңнән артык кешене сезонлы һәм вакытлыча хезмәт белән тәэмин итә, шулай ук граждани һәм патриотик тәрбия бирү белән дә шөгыльләнә, яшьләрнең иҗади һәм спорт потенциалын үстерә.
1963 елдан Республика студент отрядлары штабы эшкә урнаштыру мәсьәләләрен хәл итә һәм хезмәт базарында студентларның конкуренциягә сәләтен арттыра. Ел саен студент отрядлары ярдәме белән 10 меңнән артык студент ел әйләнәсе эш таба, эш өчен яңа территорияләр һәм өлкәләрне, яңа объектлар һәм предприятиеләрне колачлый, яшьләр арасында хезмәтне популярлаштыра.
Җәйге хезмәт сезоны вакытында студент отрядларында катнашучылар бушлай яшәү һәм туклану белән тәэмин ителәләр, эшкә урнашу һәм медицина тикшерүен узу урыннарына кадәр барып кайту өчен компенсация алалар.
Студентларның хезмәт отрядларында катнашучылар РФ Хөкүмәтенең 2021 елның 9 июнендәге 876 номерлы карары нигезендә эшче белгечлекләр буенча бушлай һөнәри белем алырга мөмкин. Мәсәлән, 2022 елның язында 1079 яшь кеше 35 һөнәр буенча әзерлек узган.
Шулай ук 2020 елда «Яшьләргә эш» яшьләрне эшкә урнаштыру порталы эшли башлаган: https://rabota.tatar/. Проект Татарстан Республикасы территориясендә яшәүче 18 яшьтән алып 35 яшькә кадәрге югары һәм һөнәри белем бирү оешмаларында белем алуның теләсә кайсы баскычында булган һәм теләсә нинди квалификациядәге яшь кешеләр өчен билгеләнгән. Әлеге система студентларны ел әйләнәсе эшкә урнаштырырга мөмкинлек бирә. Порталның эш эзләү системаларыннан төп аермасы – аның яшьләргә юнәлгән булуы, кулланучыларны модернизацияләү системасы, шулай ук эш эзләүчеләрнең һәм эш бирүчеләрнең ышанычлылыгын һәм сыйфатын тәэмин итү өчен бәяләү һәм бәяләмәләр системасын интеграцияләү.
Студент отрядлары – беренче хезмәт тәҗрибәсе һәм хезмәт хакы, тату команда, даими үсеш, талантларны ачу, ә иң мөһиме, төбәкләрне һәм буыннарны берләштерүче зур хәрәкәтнең бер өлешенә әйләнү мөмкинлеге.
Студент отрядларының эшчәнлеге һәм актуаль вакансияләр турында тулырак мәгълүмат белән ВКонтакте социаль челтәрендә: https://vk.com/trorso, https://sto-rt.tatarstan.ru/ сайтында яки 8 (843) 231-82-27 телефоны буенча танышырга мөмкин.