Татарстанның Дәүләт Советы Татарстан белән Марий Эл республикалары арасында чикнең урнашу урынын билгеләү турындагы килешүне раслады
Бүген ТР Дәүләт Советының алтынчы чакырылышының утыз дүртенче утырышы узды. Президиум карары нигезендә, көн тәртибенә 28 мәсьәлә кертелгән иде, алар арасында РФ субъектлары – Татарстан һәм Марий Эл республикалары арасында чикнең урнашу урынын билгеләү турындагы килешүне раслау каралган иде.
Татарстан Республикасы Җир һәм мөлкәт мөнәсәбәтләре министрлыгына республика чиген билгеләү буенча эш алып бару йөкләнелгән иде. Эшләрне башкаручы итеп, министрлык боерыгы белән, Татарстан Республикасы Пространство белешмәләре фонды билгеләнде.
Марий Эл Республикасы белән чикне билгеләү эшләре 2019 ел ахырыннан бирле алып барылды. Чиктә Татарстан Республикасының Яшел Үзән, Биектау, Әтнә, Арча һәм Балтач районнары урнашкан (Марий Эл ягыннан – Волжск шәһәре, Волжский, Моркинский һәм Мари-Турекский районнары).
2020 ел уртасына кадәр “Татарстан Республикасы Пространство белешмәләре фонды” ДБУ кирәкле картографик материаллар җыю һәм чик узуның беренчел проектын булдыру буенча чаралар башкарды. ВКС режимында очрашулар, Йошкар-Олада киңәшмәләр, Татарстан, Марий Эл, Киров өлкәсе һәм Волжск шәһәре янындагы чикнең төенле нокталарын билгеләү өчен урынга чыгулар дә үткәрелде.
Тәкъдим ителгән Килешүне депутатлар бертавыштан кабул итте.
Исегезгә төшерәбез, Татарстан Республикасы чигенең гомуми озынлыгы – 3 431 километр. Республика Россия Федерациясенең 8 субъекты белән чиктәш. Хәзерге вакытта эш төркемнәре киңәшмәләре барышында җиде чиктәш субъект белән чикнең урнашу урыны каралган һәм килешенгән (Башкортостан, Марий Эл, Чувашия, Удмуртия республикалары, шулай ук Оренбург, Самара, Ульяновск өлкәләре белән).
Чикне билгеләү буенча эшләр барышында иң элек 570тән артык проблемалы участок табылган иде. Хәзерге вакытта Киров өлкәсе белән 1 чик участогын килештерәсе калды.