Кадастр бәясе ЕГРНда булган мәгълүматка карап саналачак
Хәзерге вакытта Татарстан Республикасында җир кишәрлекләренең кадастр бәясен билгеләү буенча эшләр алып барыла. Дәүләт кадастр бәяләве процессы автоматлаштырылган: хисапларда ЕГРНда (Бердәм күчемсез дәүләт мөлкәте реестрында) тупланган мәгълүматлар файдаланыла.
Җир кишәрлегенең кадастр бәясе күләменә төрле бәяләү факторлары йогынты ясый. Аларның иң мөһимнәре түбәндәгеләр:
- мәйдан;
- җир категориясе;
- рөхсәт ителгән файдалану төре.
Рөхсәт ителгән файдалану төре - кануннар белән билгеләнгән, кишәрлектә башкарырга рөхсәт ителгән эшчәнлек төрләрен (торак төзелеше, авыл хуҗалыгы, сәүдә һәм башкаларны) ачыклаучы параметр. Әлеге күрсәткеч кадастр бәясенең тайпылышына һәм, нәтиҗә буларак, салымның төгәл булмаганча исәпләнүенә китерүче иң киң таралган сәбәпләрнең берсе булып тора.
Дәүләт кадастр бәяләве турында методик күрсәтмәләрнең I бүлеге 8 нче пункты нигезендә, әгәр җир кишәрлегенең «күпкатлы» яки «төгәл булмаган» рөхсәт ителгән файдалану төре бар икән, кадастр бәясе объектның иң югары бәясен тәэмин итүче, ягъни иң нәтиҗәле файдалану варианты нигезендә билгеләнә.
Мисал: кишәрлектә гамәлдә шәхси торак йорт урнашкан, ә ЕГРНда рөхсәт ителгән файдалану төре булып «Торак төзелеш (код 2.0)» күрсәтелгән. Мондый очракта бәя күпкатлы төзелеш өчен исәпләнгән кебек чыгарылачак, бу исә салым йөкләнешенең шактый артуына китерәчәк.
Милек хокукына ия затларга нәрсә эшләргә киңәш ителә
- Үзегезнең җир кишәрлеге турындагы мәгълүматларны тикшерергә.
- Моның өчен ЕГРНнан беләшмә алырга яисә «Ачык кадастр картасы» сервисыннан файдаланырга кирәк.
- Әгәр аермалыклар табылса, шулай ук рөхсәт ителгән файдалану төре «төгәл булмаган» яки «күпкатлы» булса, ЕГРНга үзгәрешләр кертүне башлап җибәрергә кирәк.
Татарстан Республикасында чираттагы дәүләт кадастр бәяләвен үткәрү эшләре башлану уңаеннан күчемсез мөлкәт объектлары турындагы белешмәләрне вакытында тикшереп, актуальләштерергә киңәш ителә.
ЕГРНдагы актуаль һәм дөрес мәгълүматлар - төгәл кадастр бәясенең һәм фаразлана алырлык салым салынуның нигезе ул.